مكدوس الفاصوليا
طبق سهل وسريع بعد ما تسوينه تقدمينه مباشره أو تحفظينه في برطمانات صغيرة وتكون معقمه، لا تلتزمين بالمقادير، أهم شي عرفتي المكونات عاد تزيدين وتقللين حسب الرغبه، تقدرين تضيفين البابريكا المجروشه أنا أشتريها دايماً من تركيا وايد حلوه بالأكل أو تستخدمين البابريكا العاديه لكن نوعيه جيده، مخلل الفاصوليا يقعد معاج أكثر من شهر إذا كنتي معقمه العلب عدل
المقادير:
١كيلو فاصوليا مقطعة ومسلوقة
١/٢ كوب دبس الفليفله
١/٢ – ٣/٤ كوب جوز مقطع
١ ملعقة صغيرة فلفل أحمر مجروش
١/٢ ملعقة صغيرة ثوم مدقوق
زيت زيتون
ملح
قطعي الفاصوليه قطع متساوية
سلقيها بالماء المغلي لمدة دقائق مو أكثر
طبخيها لين تشوفين حبات الفوصوليا بدأت تصير لينه ( لا تخلينها تصير وايد لينه )
بعد ما نضجت حطيها بمشخاله (مصفاة)
حطي الفاصوليا في سلة فيها فتحات
حطي سلة ثانية فوق الفاصوليا
وحطي عليها أي ثقل عندج (ساعات أحط جدر كبير فيه ماي فيصير ثقل ممتاز أو أستخدم هذي الأداة مالت البانيني )، وخليه بالثلاجه نص يوم أو ليله
شوفي في طريقتين الأولى تتبعين الخطوات السابقه يعني تحطين الفاصوليا في السلة وتضغطينه أو بعد ما تسلقين الفاصوليا وتصفينها تفردينه في صينية كبيرة وتحفظينه بالثلاجه لين ينشف الماي تماماً يعني بدون ما ينضغط، جربت الطريقتين والنتيجه نفسها
حطي الجوز بالخلاط
وجرشيه (ساعات ما أحطه بالخلاط أستخدم السكين وأهو الأسهل)
حطي الجوز المجروش في الباديه (زبدية)
حطي دبس الفليفلة
والثوم مع الفلفل الحار المجروس أو البودر
ضيفي زيت الزيتون
وتبليه بالملح
ضيفي الفاصوليا
خلطي المكونات وضيفيله زيت زيتون مره ثانيه
وزعي الفاصوليا في علب زجاج مع الضغط (لا تنسين تعقمين العلب قبل لا تستخدمينهم)
حطي زيت الزيتون بحيث يغطي الخلطة وخليه مكشوف دقايق لين يطلع الهواء منه تالي سكريه وحفظيه بالثلاجه
قدميه مع خبز إيراني ( خبز تنور، تميس) وبالعافيه،،،
الطريقة:
- بعد سلق الفاصوليا تترك في مصفاة بالثلاجة حتى يجف السائل تماماً.
- يخلط دبس الفليفلة مع الجوز والثوم وزيت الزيتون والملح،
- تضاف الفصوليا لخلطة الفليلفة وتوزع في برطمانات مع الضغط عليها.
- تملئ العلب بزيت الزيتون وتحفط بالثلاجة.
Leave a Reply