بوري البطاط
شفت الوصفة باليوتيوب وعجبتني فكرتها فطبقتها مع تعديل المكونات وبإضافة البهارات والكزبرة طلعت وايد حلوه، قدميها مع الروب بالنعناع ( الجتني) أو حمسة بطاط هندية أو مع العدس أو الجبن الفرنسي المهم جربوها وإن شاء الله تعجبكم لا تنسون تصورونها وتمنشنوني بالإنستقرام
المقادير:
٢ بطاطس مسلوقه مهروسة
١ ملعقة صغيرة ملح
١ ملعقة صغيرة كراوية
١/٢ ملعقة صغيرة كركم
١/٤ ملعقة صغيرة كمون مطحون
١/٤ ملعقة صغيرة كزبر مطحون
٢ ملعقة كبيرة كزبرة خضراء مفرومة
٢ ملعقة كبيرة مملوءة طحين نخي
٢ ملعقة كبيرة زيت
طحين ابيض لجميع الاستعمالات حسب الحاجة
غسلي البطاط
حطيه في الجدر وصبي عليه ماي فاتر
غطي الجدر وخليه لين يستوي
قشري البطاط
تالي هرسيه بهذي الأداة أو أي أداة متوفره عندج
حطي الكركم
الملح
الكراوية
كمون
كزبر مطحون
الكزبرة المفرومة
ضيفي طحين نخي
خلطي المكونات
ضيفي الطحين الأبيض بالتدريج وحسب الحاجة ( تقدرين تضيفين ١ ملعقة صغيرة بيكنج باودر )
الحين حطي الزيت وعجنيها
غطي العجينة وخليها ترتاح 10 دقايق
قعطي العجينة لثلاث قطع
فردي العجينة على سطح مرشوش بالطحين ( لا ترقين العجينه وايد )
قطعي العجينة لدواىر صغيرة
علشان تنتفخ عندج العجينة لازم ما تكون رقيقه وايد خليها بسماكة ٣ مل تقريباً
إقلي دوائر العجينة بزيت غزير
أثناء القلي طبطبي على البوري وصبي عليه الزيت علشان تنتفخ عندج
قلبيها للجهة الثانية علشان تتحمر
وبالعافيه،،،
الطريقة:
- يخلط البطاطس مع جميع البهارات والملح وطحين النخي.
- يضاف الطحين الأبيض بالتدريج حتى تتشكل عجينة متماسكة وشبه صلبة.
- يوضع الزيت وتعجن ثم تكور وتغطى لمدة ١٠ دقائق.
- تفرد العجينة على سطح مرشوش بالطحين ثم تقطع دوائر صغيرة وتقلى بزيت غزير وساخن مع الطبطبة عليها حتى تنتفخ.
Leave a Reply